محکمہ موسمیات کی پیش گوئی: ساحلی علاقوں میں موسلا دھار بارش کا امکان

کراچی: محکمہ موسمیات نے خبردار کیا ہے کہ بحیرہ عرب میں بننے والا ہوا کا کم دباؤ ساحلی علاقوں کی جانب بڑھ رہا ہے جس کے باعث آئندہ چوبیس سے اڑتالیس گھنٹوں کے دوران کراچی، ٹھٹھہ، بدین اور گردونواح میں موسلا دھار بارش کا امکان ہے۔

محکمہ موسمیات کے ڈائریکٹر کے مطابق بارش کا یہ سلسلہ وقفے وقفے سے جاری رہ سکتا ہے اور بعض علاقوں میں ژالہ باری بھی ہو سکتی ہے۔ شہریوں کو غیر ضروری سفر سے گریز کرنے کی ہدایت کی گئی ہے۔

سندھ حکومت نے ممکنہ اربن فلڈنگ کے پیش نظر متعلقہ اداروں کو الرٹ کر دیا ہے۔ کے ایم سی اور دیگر بلدیاتی اداروں کو نالوں کی صفائی اور پانی کی نکاسی کے انتظامات مکمل کرنے کی ہدایت جاری کی گئی ہے۔

ماہرین کا کہنا ہے کہ مون سون کا یہ مرحلہ معمول سے زیادہ فعال ہے اور موسمیاتی تبدیلی کے اثرات اب واضح طور پر دیکھے جا سکتے ہیں۔ ان کے مطابق شہری منصوبہ بندی میں نکاسی آب کے نظام کو ترجیح دینی چاہیے۔

دوسری جانب کسانوں نے بارش کی پیش گوئی کا خیر مقدم کیا ہے۔ ان کا کہنا ہے کہ فصلوں کے لیے یہ بارشیں فائدہ مند ثابت ہوں گی تاہم کچی آبادیوں میں رہنے والے افراد کو احتیاط برتنی چاہیے۔