پنجاب میں دھند کا راج، موٹروے کے کئی سیکشن بند

لاہور: پنجاب کے میدانی علاقوں میں شدید دھند کا راج ہے جس کے باعث موٹروے کے کئی سیکشن ٹریفک کے لیے بند کر دیے گئے ہیں۔ حد نگاہ انتہائی کم ہونے سے ٹریفک کی روانی متاثر ہوئی ہے۔

موٹروے پولیس کے مطابق لاہور سے اسلام آباد اور ملتان جانے والی ٹریفک کو متبادل راستے استعمال کرنے کی ہدایت کی گئی ہے۔

محکمہ موسمیات کے مطابق دھند کا یہ سلسلہ آئندہ چند روز تک جاری رہ سکتا ہے۔ شہریوں کو صبح کے وقت غیر ضروری سفر سے گریز کا مشورہ دیا گیا ہے۔

ٹریفک حکام نے ڈرائیوروں کو ہدایت کی ہے کہ فوگ لائٹس کا استعمال کریں، رفتار کم رکھیں اور گاڑیوں کے درمیان مناسب فاصلہ رکھیں۔

ماہرین صحت کے مطابق دھند میں فضائی آلودگی بڑھ جاتی ہے۔ دمے اور سانس کے مریضوں کو خاص احتیاط برتنی چاہیے۔